प्रचण्डले गरे केन्द्रीय सदस्यकै विरुद्ध कारबाहीको चेतावनीपूर्ण घाेषणा
काठमाडौं : नेपाली कम्युनिष्ट पार्टी (नेकपा) भित्रको आन्तरिक विद्रोहले अब नयाँ मोड लिएको छ। पार्टीकै केन्द्रीय सदस्यहरूले चुनावमा ‘घण्टी’ (पार्टीको चुनाव चिह्न) मा नभई अर्कै दललाई मतदान गरेको खुलासा भएपछि पार्टी संयोजक पुष्पकमल दाहाल प्रचण्डले ठूलो कारबाहीको घोषणा गरेका छन्। जनवर्गीय संगठनका नेताहरूसँगको भेलामा उनले यो सत्यतथ्य सार्वजनिक गर्दै पार्टी पुनर्गठनको अभियान यहीँबाट सुरु गर्ने बताएका हुन्।
प्रचण्डका अनुसार पार्टीभित्रै छलछाम गर्नेहरूको पहिचान नहुँदासम्म संगठन सुदृढ हुन सक्दैन। उनले भने, “हामीसँग रिपोर्ट छ– झन्डै ५० प्रतिशतले घण्टीमा भोट हाले। सबभन्दा बढी तपाईंहरूकै जनवर्गीय संगठनका केन्द्रीय नेताहरूले घण्टीमा भोट हालेछन्। कुन कुन केन्द्रीय सदस्य, प्रदेश सदस्य र संगठनका नेताले पार्टीलाई भोट हालेनन्, त्यो रिपोर्ट तपाईंहरूले दिनैपर्छ।”
उनले यस्ता नेताहरूलाई निर्मम कारबाहीको चेतावनी दिँदै भने, “उनीहरूको पहिचान गरेर हामी कारबाही गर्छौं। अब यहीबाट पार्टी पुनर्निर्माण सुरु हुन्छ। नत्र कुनै पनि हालतमा पार्टी बनाउन सकिँदैन।”
प्रचण्डले निर्वाचनको समयमा आ-आफ्नो क्षेत्रमा नखटिने नेताहरूलाई समेत कारबाहीको दायरामा ल्याइने स्पष्ट पारेका छन्। चुनावी समीक्षासहितको रिपोर्ट आउने क्रम जारी रहेको उनले जानकारी दिए।
यो घटनाक्रमले नेकपाको आन्तरिक अवस्थालाई थप जटिल बनाएको छ। चुनावअघि २६ वटा विभिन्न वामपन्थी घटक मिलेर बनेको नेकपामा २५ सय केन्द्रीय सदस्य रहेको बताइन्थ्यो। तर, प्रत्यक्षतर्फ जम्मा ८ सिट मात्र जितेको यो पार्टीले समानुपातिकतर्फ ८ लाख ११ हजार मत प्राप्त गरेको छ।
यो संख्याले पार्टीको दाबी गरिएको संगठित सदस्य संख्या (९ लाख) भन्दा पनि करिब एक लाख कम मत आएको देखिन्छ। पार्टीभित्रैका नेताहरूले नै घण्टीमा मत नहाल्दा यो अवस्था सिर्जना भएको प्रचण्डको आरोपले अब पार्टीभित्र ठूलो राजनीतिक भूचाल आउने संकेत गरेको छ।
अब प्रचण्डले जनवर्गीय संगठनका नेताहरूबाट माग गरेको ‘घण्टीमा भोट नहाल्नेहरूको सूची’ ले पार्टीको एकता र भावी गतिलाई नै निर्धारण गर्ने देखिन्छ। आफ्नै पार्टीका केन्द्रीय सदस्यहरूविरुद्ध नै यति ठूलो कारबाहीको घोषणा हुनुले नेकपाभित्रको आन्तरिक द्वन्द्व चरम उत्कर्षमा पुगेको संकेत गर्दछ।
