चीनले समुन्द्रबाट नौ उपग्रह प्रक्षेपण गर्यो, भार र कक्षीय उचाइमा नयाँ कीर्तिमान
ड्रागन मिडिया समाचार कक्ष
चीनले बुधबार पूर्वी चीनको शाङहाई तट नजिकको समुन्द्रबाट नौवटा उपग्रह सफलतापूर्वक प्रक्षेपण गरी पूर्वनिर्धारित कक्षमा स्थापित गरेको छ। ताइयुआन उपग्रह प्रक्षेपण केन्द्रले सञ्चालन गरेको अभियानअन्तर्गत छ्यानफान तारामण्डलका नयाँ उपग्रह समूह र ईयूएचटी प्रविधि परीक्षण उपग्रहलाई ग्राभिटी-१ वाई३ वाहक रकेटमार्फत बेइजिङ समयअनुसार बिहान ६ बजे प्रक्षेपण गरिएको हो।
चिनियाँ व्यावसायिक अन्तरिक्ष कम्पनी ओरिएनस्पेसका अनुसार यो अभियानले चीनको एकल समुन्द्री प्रक्षेपणमा कुल पेलोड भार र कक्षीय उचाइ दुवैमा नयाँ कीर्तिमान कायम गरेको छ। रकेटले तीन टनभन्दा बढी शुद्ध पेलोडलाई करिब ८०० किलोमिटर उचाइको कक्षमा पुर्याएको कम्पनीले जनाएको छ।
यस उपलब्धिले मध्यम तथा ठूला आकारका उपग्रह प्रक्षेपणका लागि समुन्द्रबाट गरिने प्रक्षेपण प्रणालीको क्षमता र अनुकूलता प्रमाणित गरेको ओरिएनस्पेसको भनाइ छ। ग्राभिटी-१ रकेटले हालसम्म चारवटा समुन्द्री प्रक्षेपण सम्पन्न गरिसकेको छ र ती सबै सफल भएका छन्।
बुधबारको अभियान ग्राभिटी-१ रकेटले ठूलो तल्लो पृथ्वी कक्षीय उपग्रह इन्टरनेट तारामण्डलको नेटवर्क निर्माणका लागि गरेको पहिलो प्रक्षेपणसमेत हो। छ्यानफान तारामण्डल चीनले विकास गरिरहेको ठूलो तल्लो पृथ्वी कक्षीय उपग्रह इन्टरनेट प्रणालीमध्ये एक हो।
ओरिएनस्पेसका अनुसार प्रक्षेपण गरिएका उपग्रहहरू शाङहाईमै निर्माण गरिएका थिए र शाङहाई नजिकको समुन्द्री क्षेत्रबाट प्रक्षेपण गरिएको हो। उत्पादन केन्द्र र समुन्द्री प्रक्षेपणस्थलबीचको यस्तो समन्वयले व्यावसायिक अन्तरिक्ष उद्योगमा उपग्रह निर्माणदेखि प्रक्षेपणसम्मको समग्र कार्यक्षमता सुधार गर्न सहयोग पुर्याउने अपेक्षा गरिएको छ।
चीनले पछिल्ला वर्षहरूमा व्यावसायिक अन्तरिक्ष क्षेत्र, तल्लो पृथ्वी कक्षीय सञ्चार उपग्रह, पुनःप्रयोगयोग्य प्रक्षेपण प्रविधि तथा समुन्द्री प्रक्षेपण क्षमतामा तीव्र विस्तार गरिरहेको छ। पछिल्लो सफलताले चीनको समुन्द्री प्रक्षेपण प्रणाली ठूला पेलोड र उच्च कक्षीय आवश्यकतासमेत पूरा गर्न सक्ने स्तरतर्फ अघि बढिरहेको संकेत गरेको छ।
