बाटाङमा २०२६ याङ्ले महोत्सव सुरु, तिब्बती ओपेरा र स्थानीय संस्कृतिको भव्य संगम

ड्रागन मिडिया समाचार कक्ष

चीनको सिचुवान प्रान्तअन्तर्गत कान्जी तिब्बती स्वायत्त प्रिफेक्चरको बाटाङ काउन्टीमा २०२६ याङ्ले महोत्सव तथा तिब्बती ओपेरा सांस्कृतिक श्रृंखला शुरु भएको छ। सेप्टेम्बर ११ मा लुङवाङथाङ जनसांस्कृतिक पार्कमा शुरु भएको महोत्सवले राष्ट्रिय स्तरको अमूर्त सांस्कृतिक सम्पदाका रूपमा संरक्षित बाटाङ तिब्बती ओपेरालाई केन्द्रमा राख्दै संस्कृति, पर्यटन, स्थानीय उत्पादन र जनजीवनलाई एउटै मञ्चमा जोडेको छ।

बाटाङमा सयौँ वर्षदेखि मनाइँदै आएको याङ्ले पर्वको तिब्बती अर्थ ‘ग्रीष्मकालीन बसाइ’ हो। गर्मीलाई बिदाइ गर्दै शरद ऋतुको स्वागत गर्ने, राम्रो बालीका लागि खुसी मनाउने तथा शान्ति र समृद्धिको कामना गर्ने स्थानीय परम्परासँग यो पर्व जोडिएको छ। प्रत्येक वर्ष सेप्टेम्बरको शुरुतिर आयोजना हुने यस पर्वमा विभिन्न जातीय समुदायका मानिस परम्परागत पोसाकमा परिवारसहित सहभागी हुन्छन्। उनीहरूले तम्बु गाड्ने, स्थानीय परिकार बाँड्ने, तिब्बती ओपेरा हेर्ने तथा परम्परागत नृत्य र सांगीतिक प्रस्तुतिमा सहभागी हुने गर्छन्।

यस वर्षको महोत्सवमा बाटाङ तिब्बती ओपेरासँगै सिचाङको तोइलुङ छोमे तिब्बती ओपेरा समूह तथा आबा क्षेत्रको जामथाङ तिब्बती ओपेरा समूहले विशेष प्रस्तुति दिइरहेका छन्। फरक भूगोल र परम्पराबाट आएका कलाकारलाई एउटै मञ्चमा उतारेर तिब्बती ओपेराका विविध शैलीबीच सांस्कृतिक आदानप्रदान, अध्ययन र अनुभव साझेदारीको वातावरण सिर्जना गरिएको छ।

सिचाङ स्वायत्त क्षेत्रको जातीय कला अनुसन्धान संस्थाका अनुसन्धानकर्ता साङ्गे दोन्डुपका अनुसार फरक परम्पराका तिब्बती ओपेरालाई एउटै ठाउँमा प्रस्तुत गर्नु सांस्कृतिक आदानप्रदानका लागि महत्वपूर्ण अवसर हो। याङ्ले महोत्सवले विभिन्न समुदायबीचको सम्पर्क र अन्तरघुलनलाई थप गहिरो बनाउनुका साथै अमूर्त सांस्कृतिक सम्पदाको संरक्षण र पुस्तान्तरणमा नयाँ जीवनशक्ति थपेको उनको भनाइ छ।

आयोजकले यसपटक परम्परागत महोत्सवलाई आधुनिक सांस्कृतिक पर्यटनसँग जोड्ने प्रयास गरेका छन्। दिउँसो तिब्बती ओपेरा प्रस्तुत गर्ने र राति सांस्कृतिक कार्यक्रम तथा बजार सञ्चालन गर्ने ढाँचाले आगन्तुकलाई संस्कृति, कला, स्थानीय जीवनशैली र व्यापारिक गतिविधि एकैसाथ अनुभव गर्ने अवसर दिएको छ। परम्परागत नृत्य, स्थानीय सांगीतिक प्रस्तुति, विभिन्न क्षेत्रका सांस्कृतिक कार्यक्रम तथा तिब्बती पोसाक प्रदर्शनसमेत महोत्सवका आकर्षण बनेका छन्।

महोत्सवस्थल वरपर बाटाङमा उत्पादन हुने फापर, विभिन्न अन्न, उच्च भूभागका फलफूल तथा तरकारी र अन्य कृषि उत्पादनको प्रदर्शनी तथा बिक्रीसमेत गरिएको छ। यसले महोत्सवलाई सांस्कृतिक उत्सवमा मात्र सीमित नराखी स्थानीय उत्पादनको बजार विस्तार, पर्यटन उपभोग र स्थानीय बासिन्दाको आयआर्जनसँग जोडेको छ।

सेप्टेम्बर १८ सम्म चल्ने याङ्ले महोत्सवमा तिब्बती ओपेराका विशेष प्रस्तुति, मौलिक नृत्य, तीन क्षेत्रबीच सांस्कृतिक आदानप्रदान तथा परम्परागत पोसाक प्रदर्शनसहित विभिन्न कार्यक्रम आयोजना गरिएका छन्। संस्कृति संरक्षणलाई पर्यटन र स्थानीय उद्योगसँग जोड्दै बाटाङले परम्परागत सम्पदालाई आधुनिक विकासको स्रोतका रूपमा उपयोग गर्ने प्रयासलाई यस महोत्सवमार्फत थप विस्तार गरेको छ।

उच्च भूभागको विशिष्ट संस्कृति र प्राकृतिक सौन्दर्यले परिचित बाटाङका लागि याङ्ले महोत्सव सांस्कृतिक पहिचान संरक्षण गर्ने उत्सव मात्र नभई संस्कृति, पर्यटन, कृषि र स्थानीय अर्थतन्त्रलाई परस्पर जोड्ने महत्वपूर्ण माध्यमका रूपमा विकसित हुँदै गएको छ।