मंगोलियामा महिला तथा बालबालिकामाथिको हिंसा रोकथामका लागि एडीबीको ३० लाख डलर अनुदान
ड्रागन मिडिया समाचार कक्ष
एसियाली विकास बैंकले मंगोलियामा महिला तथा बालबालिकामाथि हुने हिंसा रोकथाम तथा त्यसको प्रभावकारी प्रतिकारका लागि ३० लाख अमेरिकी डलर अनुदान स्वीकृत गरेको छ। उक्त रकम सुरक्षित विद्यालय वातावरण निर्माण, हिंसाबाट प्रभावित व्यक्तिका लागि सहयोग सेवा विस्तार तथा आवश्यक नीतिगत सुधारमा प्रयोग गरिनेछ।
कुल अनुदानमध्ये १० लाख डलर एसियाली विकास कोषबाट र २० लाख डलर जापान सरकारद्वारा एसियाली विकास बैंकमार्फत सञ्चालित जापान फन्ड फर प्रोस्परस एन्ड रेजिलियन्ट एसिया एन्ड द प्यासिफिकबाट उपलब्ध गराइनेछ।
‘मंगोलियामा लैङ्गिक हिंसा रोकथाम तथा प्रतिकार परियोजना’ अन्तर्गत अपाङ्गता भएका बालबालिकासहित करिब १९ हजार ५०० विद्यार्थीका लागि सुरक्षित सिकाइ वातावरण तयार गरिनेछ। साथै १२ विद्यालयमा व्यापक हिंसा रोकथाम कार्यक्रम सञ्चालन गरिनेछ।
परियोजनाले हिंसाबाट प्रभावित तथा जोखिममा रहेका युवा र बालबालिकाका लागि पुनर्स्थापना, पुनर्वास र सशक्तीकरणसम्बन्धी सेवा विस्तार गर्ने लक्ष्य राखेको छ। शिक्षक, सामाजिक कार्यकर्ता, मनोवैज्ञानिक तथा अग्रपंक्तिमा काम गर्ने अन्य सेवा प्रदायकको क्षमता विकास पनि परियोजनाको प्रमुख पक्ष हुनेछ।
यसका साथै महिला विरुद्ध हुने हिंसा रोकथाम तथा प्रतिकारलाई प्रभावकारी बनाउन नीतिगत तथा संस्थागत सुधारमा सहयोग गरिनेछ। पछिल्लो समय बढ्दै गएको अनलाइन दुर्व्यवहार तथा डिजिटल माध्यमबाट हुने हिंसालाई समेत परियोजनाले सम्बोधन गर्नेछ।
