राष्ट्रिय शोकबीच प्रधानमन्त्री शाहको अमेरिका भ्रमण, विमानस्थलमा औपचारिक बिदाइ र गार्ड अफ अनर नहुनेराष्ट्रिय शोकबीच प्रधानमन्त्री शाहको अमेरिका भ्रमण, विमानस्थलमा औपचारिक बिदाइ र गार्ड अफ अनर नहुने

ड्रागन मिडिया सम्वाददाता

प्रधानमन्त्री वालेन्द्र शाह संयुक्त राष्ट्रसंघको ८१औं महासभामा सहभागी हुन मंगलबार साँझ अमेरिका प्रस्थान गर्दै छन्। भोटेकोशीको विनाशकारी बाढीपछि देशले ठूलो मानवीय क्षति व्यहोरिरहेको अवस्थामा प्रधानमन्त्री शाहले त्रिभुवन अन्तर्राष्ट्रिय विमानस्थलमा परम्परागत औपचारिक बिदाइ समारोह, गार्ड अफ अनर र रातो कार्पेटको व्यवस्था नगर्न निर्देशन दिएका छन्।

प्रधानमन्त्रीका सहयोगी तथा परराष्ट्र मन्त्रालयका अधिकारीहरूका अनुसार यसपटक विमानस्थलको विशिष्ट कक्षमा मन्त्री, उच्चपदस्थ सरकारी अधिकारी, सुरक्षा निकायका प्रमुख तथा कूटनीतिक प्रतिनिधिहरूको उपस्थितिमा आयोजना गरिने परम्परागत बिदाइ कार्यक्रम हुनेछैन। प्रधानमन्त्रीको सवारी विशिष्ट कक्षबाट सिधै विमान पार्किङ गरिएको स्थानसम्म पुग्ने व्यवस्था मिलाइएको छ। बिदाइ समारोहका लागि मन्त्रीहरूलाई समेत विमानस्थलमा बोलाइएको छैन।

विगतमा प्रधानमन्त्रीको औपचारिक विदेश भ्रमणका क्रममा विमानस्थलमा विशिष्ट अतिथिहरूको उपस्थितिमा बिदाइ समारोह आयोजना गर्ने, नेपाली सेनाबाट सम्मान गारत प्रदान गर्ने तथा रातो कार्पेट बिछ्याउने अभ्यास रहँदै आएको थियो। यसपटक ती औपचारिकता स्थगित गर्ने निर्णयलाई भोटेकोशी बाढीबाट उत्पन्न राष्ट्रिय परिस्थितिसँग जोडिएको छ।

सरकारी अधिकारीहरूका अनुसार ठूलो मानवीय क्षति, बेपत्ता नागरिकको खोजी, विस्थापित परिवारको व्यवस्थापन र पुनर्निर्माणको चुनौतीबीच प्रधानमन्त्रीले विदेश भ्रमणलाई अनावश्यक तामझामबाट मुक्त राख्न चाहेका हुन्। यद्यपि विमानस्थलको परम्परागत बिदाइ समारोह नगर्नु र अन्तर्राष्ट्रिय कूटनीतिक शिष्टाचार परित्याग गर्नु फरक विषय हुन्। औपचारिक स्वागत तथा बिदाइको स्वरूप परिवर्तन भए पनि विदेश भ्रमणका क्रममा पालना गर्नुपर्ने सुरक्षा, शिष्टाचार र अन्तर्राष्ट्रिय कूटनीतिक प्रक्रियाहरू यथावत् रहनेछन्।

प्रधानमन्त्री शाह मंगलबार साँझ ७ बजे कतार एयरवेजको उडानबाट दोहा हुँदै न्युयोर्क प्रस्थान गर्ने कार्यक्रम छ। दोहास्थित हमाद अन्तर्राष्ट्रिय विमानस्थलमा कार्यवाहक नेपाली राजदूत कुमार राईले उनलाई स्वागत गर्नेछन्। प्रधानमन्त्रीको भ्रमण टोलीमा मुख्य सल्लाहकार कुमार व्यञ्जनकार, प्रमुख शिष्टाचार अधिकारी कुमार खरेल, निजी फोटोग्राफर विनय शाक्य, दुई सुरक्षाकर्मी र एक शिष्टाचार अधिकृत सहभागी हुने जनाइएको छ।

प्रधानमन्त्री शाहले बिहीबार, सेप्टेम्बर २४ मा संयुक्त राष्ट्रसंघको ८१औं महासभाको उच्चस्तरीय सामान्य बहसलाई सम्बोधन गर्नेछन्। महासभामा उनले भोटेकोशी बाढीबाट नेपालले व्यहोरेको मानवीय तथा भौतिक क्षति, हिमाली क्षेत्रमा जलवायु परिवर्तनका बढ्दो जोखिम र विपद्पछिको पुनर्निर्माणका लागि अन्तर्राष्ट्रिय सहयोगको आवश्यकताबारे विश्व समुदायको ध्यानाकर्षण गराउने अपेक्षा गरिएको छ।

प्रधानमन्त्रीले महासभाका क्रममा संयुक्त राष्ट्रसंघका महासचिव एन्टोनियो गुटेरेससँग भेटवार्ता गर्ने कार्यक्रम छ। प्राप्त जानकारीअनुसार उनले यसपटक अन्य मुलुकका सरकार प्रमुखहरूसँग छुट्टाछुट्टै द्विपक्षीय भेटवार्ता गर्ने कार्यक्रम राखेका छैनन्। प्रधानमन्त्रीको भ्रमणलाई महासभामा नेपालको प्रतिनिधित्व र विपद्पछिको राष्ट्रिय आवश्यकताबारे अन्तर्राष्ट्रिय समुदायसँग संवाद गर्ने विषयमा केन्द्रित गरिएको छ।

परराष्ट्रमन्त्री शिशिर खनाल प्रधानमन्त्रीभन्दा अगाडि नै न्युयोर्क पुगेर विभिन्न मुलुकका समकक्षी तथा उच्चपदस्थ अधिकारीहरूसँग द्विपक्षीय भेटवार्तामा सहभागी भइरहेका छन्। प्रधानमन्त्रीका सहयोगी प्रदीप परियार र सुवास शर्मा पनि भ्रमण व्यवस्थापन तथा कार्यक्रम समन्वयका लागि यसअघि नै न्युयोर्क पुगिसकेका छन्।

प्रधानमन्त्री शाहको भ्रमणले नेपालले हाल सामना गरिरहेको विपद्, जलवायुजन्य जोखिम र पुनर्निर्माणको आवश्यकतालाई विश्व समुदायसमक्ष प्रस्तुत गर्ने अवसर प्रदान गर्नेछ। यस सन्दर्भमा विमानस्थलको औपचारिक बिदाइ समारोहभन्दा महासभामा नेपालको प्रस्तुति, अन्तर्राष्ट्रिय सहयोगका लागि गरिने पहल र त्यसबाट प्राप्त हुने ठोस परिणाम महत्त्वपूर्ण हुनेछन्।

परराष्ट्र मन्त्रालयका अनुसार प्रधानमन्त्री शाह सेप्टेम्बर २६, शनिबार काठमाडौं फर्कने कार्यक्रम छ।