यमनमा साउदी नेतृत्वको गठबन्धनसँग लडिरहेको छैन सिरिया : सूचना मन्त्रालय

ड्रागन मिडिया समाचार कक्ष

सिरियाली सेना यमनमा साउदी नेतृत्वको गठबन्धनसँग मिलेर लडिरहेको छैन भन्दै सिरियाली सूचना मन्त्रालयले यमन युद्धमा सहभागी भएको खबर अस्वीकार गरेको छ। मन्त्रालयले दमास्कसले साउदी अरेबियालाई दृढ समर्थन गरे पनि उसको नीतिमा नयाँ मोर्चा खोल्ने व्यवस्था नरहेको जनाएको छ।

यसअघि अमेरिकी समाचार माध्यम एक्सियोसले दमास्कस र रियादबीच हुथी आन्दोलनविरुद्ध सैन्य कारवाहीमा सहभागी गराउन १० हजारदेखि २० हजारसम्म सिरियाली सैनिक यमन पठाउने विषयमा छलफल भइरहेको दाबी गरेको थियो। एक्सियोसका अनुसार, प्रस्तावित सैन्य टोलीमा उत्तरी यमनको नियन्त्रणमा रहेको सिया समूह अन्सारुल्लाहविरुद्ध लड्ने सुन्नी सिरियाली सैनिक रहने बताइएको थियो। यस्तो कदमले यमनको युद्धलाई साम्प्रदायिक रूप दिनुका साथै द्वन्द्व थप चर्काउन सक्ने समाचारमा उल्लेख थियो।

अक्टोबर ६ मा सिरियाका अन्तरिम राष्ट्रपति अहमद अल-शराले रियादमा साउदी युवराज मोहम्मद बिन सलमान अल-सऊदसँग भेट गरेका थिए। उनीहरूबीच रणनीतिक सहकार्यका योजना छलफल भएको थियो। अल-शराले कूटनीतिक सम्बन्ध सुदृढ गर्न र संयुक्त अरब सहकार्यको नयाँ चरण शुरु गर्न युवराजलाई दमास्कस भ्रमणको निम्तो दिएका थिए।