आईसीसी स्वीकृतिको पर्खाइमा एनपीएल–३, विदेशी खेलाडीको अन्तिम टुंगो बाँकी
ड्रागन मिडिया सम्वाददाता
नेपाल क्रिकेट सङ्घले तेस्रो नेपाल प्रिमियर लिगका लागि अन्तर्राष्ट्रिय क्रिकेट परिषद्सँग आवश्यक कागजात पठाइसकेको छ। परिषद्को लिखित स्वीकृति आएपछि मात्र औपचारिक घोषणा गर्न सकिने सङ्घका सचिव पारस खड्काले बताएका छन्। उनका अनुसार प्रारम्भिक प्रतिक्रिया सकारात्मक भए पनि अन्तिम निर्णयको प्रतीक्षा छ।
स्वीकृतिले प्रतियोगिताको औपचारिक वर्गीकरण र खेलाडीका प्रदर्शनको अभिलेखनमा प्रभाव पार्ने भएकाले क्यान र टोलीहरू निर्णयको प्रतीक्षामा छन्। स्वीकृति आएपछि टोलीहरूलाई थप चर्चित विदेशी खेलाडीको सहभागिता औपचारिक रूपमा घोषणा गर्न सहज हुनेछ। प्रतियोगितासँग जोडिएका खेलाडीमा डेभिड वार्नर, मोइन अली, सिकन्दर राजा र इफ्तिखार अहमदलगायत छन्।
जनकपुर बोल्ट्सका प्रमुख कार्यकारी अधिकृत निरोज खतिवडाले परिषद्बाट छिट्टै सकारात्मक निर्णय आउने अपेक्षा व्यक्त गरेका छन्। स्वीकृतिपछि टोलीले आवश्यक थप विदेशी खेलाडी भित्र्याउन सहज हुने उनको भनाइ छ।
एनपीएललाई क्रिकेटसँगै पर्यटन प्रवर्द्धनको माध्यमका रूपमा विकास गर्न सकिने क्यानको धारणा छ। सचिव खड्काका अनुसार अघिल्लो संस्करणमा विभिन्न देशका खेलाडी, अम्पायर र कमेन्टेटर गरी करिब ६० देखि ७० जना नेपाल आएका थिए। उनीहरूले यहाँको अनुभव अन्तर्राष्ट्रिय समुदायसँग साझा गर्दा नेपालको पर्यटन र प्रतियोगिता आयोजना गर्ने क्षमताबारे सकारात्मक सन्देश फैलिन सक्ने क्यानको अपेक्षा छ।
तेस्रो संस्करण कात्तिक ९ देखि मङ्सिर ५ सम्म कीर्तिपुरस्थित त्रिभुवन विश्वविद्यालय क्रिकेट मैदानमा आयोजना हुनेछ। आठ टोली सहभागी हुने प्रतियोगिताको उद्घाटन खेलमा गत संस्करणका विजेता लुम्बिनी लायन्स र उपविजेता सुदूरपश्चिम रोयल्स भिड्नेछन्।
