गोर्खाको जगतमा नौ रुसी पर्यटक अलपत्र
ड्रागन मिडिया समाचार कक्ष
मनास्लु पदयात्रामा गएका नौ रुसी पर्यटक बुढीगण्डकी नदीमा आएको बाढीपछि गोर्खाको जगतमा अलपत्र परेका छन्। रुसी दूतावासका अनुसार आइतबार, अक्टोबर ११ मा आएको बाढीले सडक र पदमार्ग बगाएपछि उनीहरू बाहिरिन नसकेका हुन्।
पर्यटकको ज्यान र स्वास्थ्यमा तत्काल खतरा नरहेको दूतावासले जनाएको छ। सुरक्षाका लागि उनीहरू अग्लो स्थानतर्फ गएका छन् र हेलिकप्टरबाट उद्धार हुने प्रतीक्षामा छन्। तर रात बिताउने अवस्था कठिन रहेको दूतावासको भनाइ छ।
दूतावासका अनुसार हेलिकप्टरबाट उद्धार गराउन पर्यटकले आफैँ खर्च बेहोर्नुपर्ने देखिएको छ। बाढीका कारण हुने हेलिकप्टर उद्धारको खर्च यात्रुहरूको बिमाले नसमेट्ने र पर्यटकसँग त्यसका लागि आवश्यक रकम नभएको जनाइएको छ।
दूतावासले आफ्ना नागरिकको उद्धारको सम्भावना विचार गर्न स्थानीय अधिकारीहरूलाई आग्रह गरेको जनाएको छ।
