तिङ सुएश्याङले छिङ्ह्वा विश्वविद्यालयका सल्लाहकारसँग कृत्रिम बुद्धिमत्ताबारे छलफल गरे

ड्रागन मिडिया समाचार कक्ष

चिनियाँ उपप्रधानमन्त्री तिङ सुएश्याङले मङ्गलबार बेइजिङमा छिङ्ह्वा विश्वविद्यालयको अर्थशास्त्र तथा व्यवस्थापन विद्यालयको सल्लाहकार समितिका प्रतिनिधिसँग कृत्रिम बुद्धिमत्ता (एआई) को विकास र शासन व्यवस्थाबारे छलफल गरेका छन्।

चिनियाँ कम्युनिस्ट पार्टी केन्द्रीय समितिको राजनीतिक ब्युरो स्थायी समितिका सदस्यसमेत रहेका तिङले एआई नयाँ प्राविधिक क्रान्ति र औद्योगिक रूपान्तरणलाई अघि बढाउने प्रमुख शक्ति भएको बताए। मानवजातिको साझा हितमा यस प्रविधिको विकास, उपयोग र शासन गर्नुपर्नेमा उनले जोड दिए।

उनले विश्व कृत्रिम बुद्धिमत्ता सहकार्य संगठनको विकासमा सहयोग र सहभागिताका लागि समितिका प्रतिनिधिलाई स्वागत गर्दै साझा समृद्धि प्रवर्द्धन र साझा सुरक्षाको संरक्षणमा योगदान गर्न आग्रह गरे। विगत २६ वर्षदेखि समितिले चीन र अन्य देशबीच संवाद, आदानप्रदान तथा सहकार्यका लागि महत्त्वपूर्ण मञ्चका रूपमा काम गरेको उल्लेख गर्दै तिङले चीनको शिक्षा र आर्थिक विकासमा थप योगदान दिन सदस्यहरूलाई आग्रह गरे।

समितिका अध्यक्ष टिम कुकसहितका प्रतिनिधिले एआईलगायत क्षेत्रमा चीनले हासिल गरेका उपलब्धिको प्रशंसा गरे। उनीहरूले चिनियाँ बजारमा आफ्नो प्रतिबद्धता कायम राख्ने, सहकार्य विस्तार गर्ने र चीन तथा अन्तर्राष्ट्रिय समुदायबीच सेतुका रूपमा समितिको भूमिका प्रभावकारी बनाउने बताएका छन्।

विश्वका व्यावसायिक नेतृत्वकर्ता, व्यवस्थापन विद्यालयका प्रमुख र प्रख्यात विद्वान् सदस्य रहेको छिङ्ह्वा विश्वविद्यालयको अर्थशास्त्र तथा व्यवस्थापन विद्यालयको सल्लाहकार समिति सन् २००० अक्टोबरमा स्थापना भएको हो। यसको उद्देश्य विद्यालयको शिक्षण तथा अनुसन्धान क्षमता अभिवृद्धि गरी अर्थशास्त्र र व्यवस्थापन क्षेत्रमा विश्वस्तरीय संस्था बनाउनु हो।