मित्र कुञ्ज : रुससँगको ५९ वर्षे सम्बन्ध, नेपालको सेवामा सक्रियता

ड्रागन मिडिया समाचार कक्ष

रुस र सोभियत सङ्घमा उच्च शिक्षा हासिल गरेका नेपालीहरूको संस्था मित्र कुञ्जको वार्षिक साधारणसभा काठमाडौंस्थित रुसी सदनमा सम्पन्न भएको छ।

उद्घाटन सत्रमा प्रमुख अतिथि वरिष्ठ अधिवक्ता नीलाम्बर आचार्य सहभागी थिए। उनी मित्र कुञ्जका संस्थापक अध्यक्ष तथा पूर्वमन्त्री हुन्। सभामा संस्थाकी अध्यक्ष इन्जिनियर सुष्मा खत्री रञ्जित, उपाध्यक्ष इन्जिनियर रामबिन्दु श्रेष्ठ, महासचिव इन्जिनियर सञ्जय श्रेष्ठ, सचिव डा. प्रेमल के. जोशी, कोषाध्यक्ष इन्जिनियर ध्रुवमणि पौडेल, कार्यसमिति सदस्य तथा पूर्वअध्यक्षहरू सहभागी थिए।

उपाध्यक्ष रामबिन्दु श्रेष्ठले मित्र कुञ्जको ५९ वर्षे यात्राबारे चर्चा गर्दै संस्थाले विभिन्न क्षेत्रमा कार्यरत सात हजारभन्दा बढी पेसाकर्मीलाई जोडेको बताए। पूर्वअध्यक्षहरू इन्जिनियर विष्णु बी. सिंह र इन्जिनियर अच्युतानन्द भण्डारीले संस्थाको इतिहास र योगदानबारे चर्चा गर्दै आगामी योजनासमेत सुनाए। वरिष्ठ अधिवक्ता आचार्यले एकता र पेसागत अनुभवको महत्त्वमा जोड दिँदै सदस्यहरूलाई आफ्नो ज्ञान नेपालको विकासमा लगाउन आग्रह गरे।

रुसी सदनकी निर्देशक अनास्तासिया खोख्लोभाले रुसी भाषामा शुभकामना मन्तव्य दिइन्। उनले रुसी भाषा सम्झिरहने, चलचित्र तथा अन्य कार्यक्रममा सहभागी हुन रुसी सदन आउने र विद्यार्थी जीवनका आत्मीय सम्झना जोगाइराख्ने पूर्वविद्यार्थीप्रति आभार व्यक्त गरिन्। उनका अनुसार मित्र कुञ्जको बल सदस्यहरूको साझा आत्मीयतामा छ—उनीहरू पेसागत उन्नतिका लागि मात्र नभई रुसका विश्वविद्यालयमा बिताएका वर्षहरूको सम्झना र आपसी सम्बन्धका कारण पनि एकसाथ जोडिएका छन्।

खोख्लोभाले पूर्वविद्यार्थीहरूले आफैँ सञ्चालन गर्दै आएका वार्षिक स्वास्थ्य शिविर, रक्तदान कार्यक्रम र मञ्जुश्री पार्कमा वृक्षरोपणजस्ता कामको प्रशंसा गरिन्। लामो समय ढुङ्गा उत्खनन गरिएको ठाउँमा रहेको पार्कमा वृक्षरोपण गर्नु उल्लेखनीय भएको उनको भनाइ थियो। “यस कामका लागि कसैले पारिश्रमिक दिँदैन, तैपनि तपाईंहरू आफ्नो देशको हितका लागि धेरै काम गर्नुहुन्छ,” उनले भनिन्। सरकारी छात्रवृत्तिमा शिक्षा हासिल गरेर अहिले आफ्ना नागरिकको सेवामा समर्पित पूर्वविद्यार्थीहरूको सफलता रुसका लागि प्रशंसाको विषय भएको पनि उनले बताइन्।

अर्को वर्ष मित्र कुञ्जले स्थापना भएको ६० वर्ष पूरा गर्दैछ। नयाँ कार्यसमितिसँग मिलेर नेपालमा मात्र नभई रुस र क्षेत्रमै स्मरणीय हुने गरी वार्षिकोत्सव कार्यक्रम बनाइने रुसी सदनले जनाएको छ। खोख्लोभाले श्रीलङ्काको पूर्वविद्यार्थी संस्थाले हालै आफ्नो वार्षिकोत्सव मनाएको स्मरण गर्दै मित्र कुञ्जले पनि अझ राम्रो कार्यक्रम गर्नुपर्ने बताइन्।

सभाको बन्दसत्रमा वार्षिक प्रतिवेदन प्रस्तुत गरियो। महासचिव सञ्जय श्रेष्ठले कार्यसमितिको गतिविधिसम्बन्धी प्रतिवेदन र कोषाध्यक्ष ध्रुवमणि पौडेलले आर्थिक प्रतिवेदन पेस गरे। छलफलपछि दुवै प्रतिवेदन साधारणसभाबाट पारित भए। पारित प्रतिवेदनमा हस्ताक्षर गर्न सदस्यहरूमध्येबाट दुई जनालाई चयन गरिएको थियो।

अध्यक्ष इन्जिनियर सुष्मा खत्री रञ्जितले सहभागीलाई धन्यवाद दिँदै सभाका निर्णय र छलफलको समीक्षा गरेपछि साधारणसभा सम्पन्न भएको थियो।

मित्र कुञ्जको वार्षिकोत्सव वर्ष नेपाल र रुसबीचको सहकार्य तथा पूर्वविद्यार्थीबीचको सम्बन्ध अझ सुदृढ हुने नयाँ अवसर बनोस् भन्ने रुसी सदनले कामना गरेको छ।