४ मंसिर २०८३, बिहीबार

इनम सापकोटा प्रकरणमा प्रहरीसँग सचिवालयको सोधपुछ, प्रधानमन्त्री कार्यालयको भूमिकामाथि प्रश्न

ड्रागन मिडिया सम्वाददाता

प्रधानमन्त्रीको सचिवालयका सरकारी मामिला तथा योजना समन्वय संयोजक विशाल अधिकारीले हिरासतमा रहेका इनम सापकोटामाथिको अनुसन्धानबारे प्रहरी अधिकृतसँग सोधपुछ गरेको भिडियो सार्वजनिक भएको छ। भिडियो सार्वजनिक भएपछि प्रहरी अनुसन्धानमा प्रधानमन्त्रीको सचिवालयको भूमिकाबारे प्रश्न उठेका छन्।

देशसञ्चारका अनुसार जिल्ला प्रहरी परिसर काठमाडौँमा खिचिएको भिडियोमा अधिकारीले प्रहरी नायब उपरीक्षक राजु अधिकारीलाई सापकोटाको मोबाइल फोन कहाँ छ, अनुसन्धानमा के नयाँ तथ्य भेटिएका छन् र अन्य व्यक्तिसँग उनको सम्पर्क कस्तो थियो भन्ने प्रश्न सोधेका छन्। सापकोटा असोज १३ गते त्रिभुवन अन्तर्राष्ट्रिय विमानस्थलबाट पक्राउ परेका थिए। विशाल अधिकारी असोज १६ गते प्रहरी परिसर पुगेका थिए।

प्रधानमन्त्री कार्यालयका एक स्रोतले अधिकारी नियमित जानकारी लिन प्रहरी परिसर पुगेका बेला सापकोटाको विषय पनि उठेको देशसञ्चारलाई बताएका छन्। सोही दिन प्रहरी परिसरले दसैँ–तिहारलक्षित सुरक्षा योजना सार्वजनिक गर्न पत्रकार सम्मेलन गरेको थियो। प्रधानमन्त्री कार्यालयले यसबारे औपचारिक प्रतिक्रिया दिएको छैन।

सापकोटाका मोबाइल फोन प्रहरीको फरेन्सिक परीक्षणअघि प्रधानमन्त्रीका प्रमुख सल्लाहकार कुमार बेञ्जनकार (बेन) को ललितपुरस्थित घरमा दुई दिन राखिएको दाबी सेतोपाटीले गरेको थियो। बेञ्जनकारले आफूसँग सम्बन्धित केही सन्देश मेटाएको आरोप पनि लागेको छ। जिल्ला प्रहरी परिसर काठमाडौँले अनुसन्धानका प्रमाण कुनै अन्य व्यक्तिलाई नदिएको भन्दै उक्त समाचारको खण्डन गरेको छ। बेञ्जनकार र विशाल अधिकारीको सार्वजनिक प्रतिक्रिया आएको छैन।

जेनजी मुभमेन्ट नेपालले बेञ्जनकार र अधिकारीसहित गृहमन्त्रीका स्वकीय सचिव जेम्स कार्की तथा प्रधानमन्त्रीका सूचना प्रविधि परामर्शदाता भनिएका चिराग श्रेष्ठलाई जिम्मेवारीबाट हटाएर पक्राउ गरी निष्पक्ष अनुसन्धान गर्न माग गरेको छ। देशसञ्चारका अनुसार कार्की र श्रेष्ठ पनि विशाल अधिकारीसँगै प्रहरी परिसर पुगेका थिए।

नेकपा एमालेका महासचिव शंकर पोखरेलले अनुसन्धान पारदर्शी नभएको भन्दै राज्य पक्षको हस्तक्षेपबारे प्रश्न उठाएका छन्। नेपाली कांग्रेसकी महामन्त्री डिला संग्रौलाले बरामद मोबाइलसम्बन्धी आरोपमा सरकार र सत्तारुढ दलले जवाफ दिनुपर्ने बताएकी छन्।

सत्तारुढ राष्ट्रिय स्वतन्त्र पार्टीका प्रवक्ता जगदीश खरेलले बेञ्जनकारबारे पार्टीले छुट्टै धारणा नबनाएको बताएका छन्। कात्तिक २९ गते त्रिभुवन अन्तर्राष्ट्रिय विमानस्थलमा पत्रकारसँग कुरा गर्दै उनले यस विषयमा प्रधानमन्त्रीले लिने निर्णयलाई पार्टीले समर्थन गर्ने बताएका थिए।

प्रहरीले सापकोटामाथि सम्पत्ति शुद्धीकरणसम्बन्धी अनुसन्धान गरिरहेको छ। देशसञ्चारका अनुसार सापकोटासँग सम्पर्क देखिएको भन्दै प्रहरीले लगानी बोर्डका पूर्वप्रमुख सुशील भट्टलाई असोज ३१ गते र महेश श्रेष्ठलाई कात्तिक २८ गते पक्राउ गरेको थियो।

Show More

Leave a Reply

Your email address will not be published. Required fields are marked *

Back to top button