शेन्जेनमा एपेक घोषणापत्र सर्वसम्मत, क्षेत्रीय सहकार्यका लागि चीनले दुई करोड डलर दिने

ड्रागन मिडिया समाचार कक्ष
एसिया–प्रशान्त आर्थिक सहकार्य (एपेक) का २१ सदस्य अर्थतन्त्रले बिहीबार चीनको शेन्जेनमा सन २०२६ को नेताहरूको घोषणापत्र सर्वसम्मतिले पारित गरेका छन्। घोषणापत्रमा एसिया–प्रशान्त समुदाय निर्माणका लागि ‘शेन्जेन दृष्टिकोण’ समेटिएको छ। चिनियाँ राष्ट्रपति सी चिनफिङले एपेकअन्तर्गतका सहकार्य कार्यक्रमका लागि चीनले दुई करोड अमेरिकी डलर उपलब्ध गराउने घोषणा गरेका छन्।
एपेकको ३३औँ आर्थिक नेताहरूको बैठकको अध्यक्षता गर्दै सीले क्षेत्रीय सहकार्यका चार आधार अघि सारे। उनले अर्थतन्त्र र व्यापारलाई सुदृढ गर्न, सम्पर्क सञ्जाल विस्तार गर्न, नवप्रवर्तनलाई प्रोत्साहन गर्न र विकासको लाभ व्यापक रूपमा बाँड्न जोड दिए। व्यापार संरक्षणवाद र भूराजनीतिक अनिश्चितता बढिरहेका बेला क्षेत्रीय बजार खुला राख्न र आर्थिक एकीकरण अघि बढाउन सदस्य अर्थतन्त्रबीच सहकार्य आवश्यक रहेको उनको भनाइ थियो।
बैठकले व्यापार, सम्पर्क सञ्जाल र नवप्रवर्तनसम्बन्धी तीन दस्तावेज पनि पारित गरेको ग्लोबल टाइम्सले जनाएको छ। नेताहरूले एसिया–प्रशान्त स्वतन्त्र व्यापार क्षेत्रको कार्यसूची अघि बढाउने प्रतिबद्धता दोहोर्याए। उनीहरूले क्षेत्रीय सम्पर्क सञ्जालको रूपरेखा र रोजगारी तथा आर्थिक समृद्धिका लागि डिजिटल तथा उदीयमान प्रविधिको उपयोगसम्बन्धी वक्तव्य अनुमोदन गरे। बैठकले सन २०२७–२०३० को व्यापार डिजिटलीकरण सहकार्य ढाँचा र सन २०२६–२०३० को एपेक कृत्रिम बुद्धिमत्ता पहलको पनि स्वागत गरेको छ।
शेन्जेन विश्वविद्यालयका प्राध्यापक वाङ युझुले भन्सार प्रक्रिया, सीमापार भुक्तानी र आपूर्ति श्रृंखलाको स्थिरताजस्ता विषयमा सहकार्य अघि बढाउन चीनले जोड दिएको बताए। उनका अनुसार व्यापार प्रक्रिया डिजिटल बनाउने र नियमहरूबीच तालमेल बढाउने प्रयासले साना तथा ठूला दुवै अर्थतन्त्रका व्यवसायलाई क्षेत्रीय बजारमा कारोबार गर्न सहज बनाउन सक्छ।
एपेक व्यावसायिक परामर्श परिषदको सचिवालयका निर्देशक अन्तोनियो आई. बासिलियोले सन २०१४ को बेइजिङ बैठकमा क्षेत्रीय सम्पर्क विस्तारमा जोड दिइएको स्मरण गरे। अहिलेको चुनौती ती सम्पर्कलाई अवरोधका बीच पनि कायम राख्नु र त्यसबाट प्राप्त लाभलाई अझ व्यापक बनाउनु रहेको उनले ग्लोबल टाइम्सलाई बताए।





