भारत भ्रमणअघि परामर्श नगरेकोमा कांग्रेस र एमालेको आपत्ति, रास्वपाद्वारा सरकारको बचाउ

ड्रागन मिडिया सम्वाददाता
प्रधानमन्त्री बालेन्द्र शाहले भारतीय समकक्षी नरेन्द्र मोदीसँगको वार्तामा नेपालले उठाउने विषयबारे विपक्षी दलहरूसँग परामर्श नगरेकोमा नेपाली कांग्रेस र नेकपा एमालेले आपत्ति जनाएका छन्। सत्तारूढ राष्ट्रिय स्वतन्त्र पार्टीले भने भ्रमणको तयारीका क्रममा कोसँग परामर्श गर्ने भन्ने निर्णय सरकारले गर्ने बताएको छ।
मोदीको निमन्त्रणामा प्रधानमन्त्री शाह दुईदिने राजकीय भ्रमणका लागि आइतबार नयाँ दिल्ली प्रस्थान गरेका हुन्। सोमबार दुई प्रधानमन्त्रीको नेतृत्वमा प्रतिनिधिमण्डलस्तरीय वार्ता भएपछि संयुक्त पत्रकार सम्मेलन गर्ने कार्यक्रम छ। वार्तामा व्यापार, पारवहन, लगानी, ऊर्जा र सीमापार सम्पर्क विस्तारलगायत विषयमा छलफल हुने तय छ।
कांग्रेस नेता विश्वप्रकाश शर्माले शनिबार जारी गरेको विज्ञप्तिमा महत्वपूर्ण विदेश भ्रमणअघि दलहरूबीचको परामर्शले राष्ट्रिय हितका विषयमा साझा धारणा बनाउन सघाउँदै आएको बताएका छन्। सरकारले यसपटक विपक्षी दल र विषयविज्ञसँग औपचारिक सुझाव नमागेकाले कांग्रेसले पनि आफ्नै पहलमा सुझाव दिन उपयुक्त नठानेको उनले उल्लेख गरेका छन्।
भ्रमणबारे राष्ट्रपति रामचन्द्र पौडेललाई जानकारी गराइएको थियो कि थिएन भन्ने प्रश्न पनि उठेको छ। राष्ट्रपतिका प्रेस सल्लाहकार किरण पोखरेलले देशको समसामयिक परिस्थिति र वैदेशिक सम्बन्धबारे प्रधानमन्त्रीले राष्ट्रपतिलाई जानकारी गराउनुपर्ने संविधानको धारा ८१ को व्यवस्था स्मरण गराए। प्रधानमन्त्रीले राष्ट्रपतिलाई भ्रमणबारे जानकारी गराएको विषयमा आफूसँग सूचना नभएको उनले रातोपाटीलाई बताए।
एमाले सचिव डा. राजन भट्टराईले नेपाल–भारत सम्बन्धका कुन विषयलाई सरकारले प्राथमिकतामा राखेको छ र कुन समस्याको समाधान खोजेको छ भन्ने स्पष्ट नभएको बताए। एमाले प्रचार तथा प्रकाशन विभाग प्रमुख निरज आचार्यले सीमा र भूभागसम्बन्धी विषयमा प्रधानमन्त्रीले ऐतिहासिक प्रमाण, नेपालको स्थापित अडान र राष्ट्रिय सहमतिका आधारमा नेपाली पक्षको धारणा स्पष्ट रूपमा राख्ने अपेक्षा व्यक्त गरे।
रास्वपाका प्रवक्ता जगदीश खरेलले भने द्विपक्षीय वार्ताको तयारी गर्न परराष्ट्र मन्त्रालय र सम्बन्धित सरकारी निकाय सक्षम रहेको बताए। उनका अनुसार प्रधानमन्त्री शाहले भ्रमणअघि सिंहदरबारमा रास्वपा सभापति रवि लामिछानेसँग करिब दुई घण्टा छलफल गरी नेपालले उठाउने विषयबारे जानकारी गराएका थिए।





